搜尋此站:

2006-11-26

20061126

今個星期比較多野做, 無乜點寫 blog~ o黎個 summary~

上星期日係影畢業相日, 先返o左科大同 5C 同學仔影相, 再落 hall 搵 hallmate, 再趕出 poly join 番 5C 同學仔, 之後再o係 poly join 埋 7S 之友影過. 行程緊迫, 不過都值得~~ 見返好多好耐無見o既朋友仔. 仲見番溫 sir 同鄧 sir~~~ 佢地兩位都算係我甲寅生涯入面最重要o既幾位老師之一了 :) 影完相出o左尖咀食壽司, d o野食中規中矩, 不過價錢上真係抵到爛... 半價 bo~~~ 當日仲用好光影o左 d 相... 不過白痴地唔記得o左用緊 6x4.5 o既框框, 當日企最邊o既人可能... 會無o左半塊面... 好光果然係次次新奇, 你永遠唔會 expect 到個結果係點... @@" Anyway, 仲有半筒未影完, 影完晒埋先 post ba...

之後o個幾日都係忙下功課忙下 part time 咁. 咁o岩 part time o個度接o左個大 project 做 penetration test, 所以二三四o既主菜都係做 pen test... 其實 part time o個度真係幾多野做, 半工讀果然係辛苦的... 不過無計, 鬼叫自己有興趣. 老闆仲要咁睇得起我地, 機會確實難得~~

星期五晚去o左同 lauming 華姐的生日聚餐~ 打邊爐~~~ 多謝華姐同埋阿細帶俾我地無限歡樂~

星期六同 hallmate 出o左去一個頹爆玩具展, $25 入場費真係唔抵到爛... 老實講兆萬皆旺比佢更有資格稱為玩具展... 慘就慘在我地一行幾人仲要去番旺角行玩具店... 強烈對比之下, 我地專登過海睇個咁o既展覽o既行為更顯笨x... 晚上搵o野食搵o左好耐終於去o左一間服務態度其差o既火窩店 (無錯... 又打邊爐...), 落單慢加o野食少加 d 待應唔應人, o係正面前都可以扮聽唔到. 叫佢加水叫到燶底都無人加, 之後水剛剛滾無耐又走o黎加水 N 次... 唯一值得表揚o既係o個位部長級人馬, 全場似乎得佢一個係做緊野, 執枱帶位加水落單俾人插一腳踢, 做到佢呔到鬆晒西裝都跌晒膊... 佢當時o既樣同剛剛俾人強姦完o係後巷走番出o黎無乜分別... 我地好同情佢, 但係... 呢間o野似然要 black list... 為免間野轉個名又一條好漢, black list o既將會係:「創興 6 樓火窩店」

今日主要係 hea 同埋休息. 無乜建設性o既野做過... 不過淨間要開始 KO 少少屯積已久o既功課同埋 project...

No comments:

Post a Comment

HTML Tags allowed (e.g. <b>, <i>, <a>)